19
04.2013

20週啦!! 第2胎孕心情分享~~

今胎唔係好多時間寫孕記, 冇計, 只係湊住Matthew仔都好唔得閒了, 生活同之前第一胎完全無得比呀~~ 所以來到20週, 剛好是孕程的一半, 來一篇summary心得分享啦! 特別上週六去探Jamie及Yoko, 又拎返本《我的低能大肚之道》返睇, 感受良多, 覺得第一胎同第二胎分別都幾大呢! 
 

 
1. 馬仔話, 結婚會令妳做一日公主, 懷孕會令妳變十月皇后 --- 第一胎都幾中架!個時身邊個個都好緊張, 特別老公超級關懷備至, 幫手做哂所有家務不但止 (個時住o係新元中細單位冇姐姐, 凡事仲係親力親為架), 又細心提我唔好雙手插袋 (陀Matthew初期係初春, 仲凍凍地架); 99又係成日煲靚湯、煮巧手小菜, 並買大量時令新鮮生果, 除了每日必備的奇異果 (維他命特高), 有期我鍾意食車厘子, 佢就每日買1-2磅返黎! 去到今胎, 老公的著緊程度就差好遠了, 有時行路唔會就我步伐啦 (可能第一胎我太健步如飛.. 今胎做唔到), 唔會咁緊張BB生長進度、胎動等等啦, 最衰係星期日姐姐放假時, 永遠都係我要早起身, 服侍Matthew換片、食早餐、坐廁所! 99相對好D, 不過有時買生果都會甩下期, 亦唔似首胎咁緊張進度囉~
 
2. 講起身體變化, 第二胎比第一胎辛苦、反胃好多!! 唔知仔女有無關係, 總之首胎陀Matthew, 我一直胃口都唔錯, 懷胎十月以來只嘔過一次 (仲係搭完西鐵有少少暈車浪個隻), 3個月後就非常精神爽利了, 去到最後階段仍然健步如飛; 但今胎一直反胃到依家, 就算來到5個月仍會朝朝反胃作嘔, 夜晚食飽D又係一樣反胃, 雖然真正嘔的次數唔算多 (身邊有D孕媽媽平均一日嘔5-6次.. 唔知點過!), 不過比較之下已經覺得好辛苦.. 同埋疲累感就算過左首3個月仍然持續, 可能都同要照顧Matthew有關啦~~
 
3. 承point 2, 今胎明顯冇上胎肥得多... 主要係第一胎胃口好, 食得多又吸收好, 雖然成日俾人講肥肚不肥人 (其實係我個肚太大, 對比之下唔覺肥... 大家睇返我舊時的大肚照就知, 首胎去到42吋腰架!!), 但事實上第一胎重得頗急, 去到中斷仲一度俾健康院姑娘warning添! 今胎就因為太反胃食唔得多野, 重得好慢, 磅數時升時減, 去到5個月左右大概重了3-4KG, 上胎個時已經double啦... 當然都同今胎大肚前, 我仲係一個未修身的肥媽媽有關~ 始終第一胎後餵人奶, 想吸引多D營養, 我係特登食多左架, 不過第2胎應該唔同了, 我想收爐兼修身呀!!
 
4. 馬仔第一胎係生女, 佢話成日肚痕, 身邊都有朋友陀女都係咁, 但so far我touchwood仲未有~~ (所以都會擔心食炸糊... 唔好呀!!) 不過我除了兩胎都冇肚痕, 其實亦唔太覺胸痛、水腫 (肥腫就試過, haha!)、腰背痛.. (真係touchwood!) 可以話, 上胎除左肚大+肥左, 其實無乜特別覺得自己似大肚婆.. 所以今胎有孕吐/反胃, 反而都覺得係另一種感受呀! (不過我都係唔想胸痛、腰痛、水腫~~)
 
5. 上胎我個肚都大得快, 未夠3個月已經見哂肚, 今胎更加係超級大肚婆!! 3/30去墾丁時, 當時我只係17週, 個肚已經好巨啦... 回港後依2星期更加生得好快, 遲D有update相再同大家分享啦~~ 另外今胎都真係較快feel到胎動, 我係遲鈍的媽媽, 上胎滿了20週先感受到胎動, 今胎就18週零開始有感覺.. 其實係咪妹妹生得比Matthew仲快呢?
 

 
好, 講到胎兒生長進度, 都記錄下今胎的生長進度先~~~
 
2013.1.18 - 第一次照超聲波, BB只得6W6D, 仲好似一粒花生, 得1.14cm咋!!
2013.2.15 - 去完日本返黎即照多次, 11W3D的BB大隻左好多呀! 手手腳腳都好清晰了, 有4.8cm呢!
2013.2.22 - 去屯門醫院照oscar, 隔了一星期的BB又大隻了, 有成5.9cm, 好多野都好清, 但都係無「咕咕」呢!
2013.3.5 - 第一次去健康院檢查, 個度冇得照超聲波, 只可以聽胎心跳, 同埋做驗尿、抽血... 除了輕微地貧要一直食葉酸 (上同都係咁), 其他一切正常, 2胎我都touchwood冇試過妊娠糖尿呢!
2013.3.18 - 再去私家照超聲波, 15W3D的BB已經超過10cm, 並有150g重了! 醫生終於肯開口講「似係女孩子」, 超開心呢~~~
2013.4.19 - 好想台灣返黎即照, 不過最終都忍手到今日再去健康院檢查, 體重增長、血壓、糖尿、胎位一切正常!! 而且睇返驗血報告, 今胎o既血色素靚左, 連地中海貧血症的情況都有好轉呢!
 
同時預告埋, 下週六4/28係21週, 會去照結構, 到時應該準好多呢!
   
最後, 我希望社會各界對大肚婆多D愛心~~ 唔知係咪唔舒服多左, 今胎特別覺得搭車好多人唔願讓座; 特別記得有朝我特別暈, 過左錦上路已經臉無血色, 身邊的小姐馬上幫我正對面的坐底的先生「先生! 有大肚婆暈呀! 可唔可以讓座呀?」點知位先生繼續訓無反應...  個小姐好無奈, 轉問先生旁邊的小姐, 又係訓!!  問埋再旁邊的男士, 都係訓, 最後去到一位約50歲的伯伯, 先讓位俾我咋...  相比早前旅行的日本及台灣, 香港人o係依方面的表現真係差太多了, 令我決定以後一定要以身作則, 教導Matthew同肚中BB由細學習關心別人, 以及讓座的禮儀!
發表於2013.4.19
留言(13)
  • 羅車車
    放心啦妳個肚陀得圓碌碌多數係小小妹嚟
    19/04/2013
  • Mrs. Wu
    我都有睇過呢本書,哈哈! 真係好低能 你就好,我陀第一個都已經無咁既service, 第二個更加吾駛講,唉! 你99都好,買下生果你食,我.....唉,自生自滅啦!
    19/04/2013
  • Little Jessie
    我就係個d 一日嘔5, 6 次,嘔足6 個月的媽媽,我都唔記得咗點過!只要見到bb 健康地來到這世界,之前幾辛苦都唔記得!如果你仲作嘔,可以飲camomile tea或薑茶,會好d 㗎!
    20/04/2013
  • 愚太
    愚太果陣都有睇呢本書呀,心情好輕鬆。
    20/04/2013
  • Lucy
    我陀小豬既時候, 1日嘔10次左右, 嘔足3個月, 輕左10磅呀, 果時日日爬去返工, 又爬返上床, 超慘。我朋友話, 食返D維他命B, 會有咁容易反胃架..
    20/04/2013
  • bmw
    係呀!我同事都係有左幾個月,佢返工搭港鐵,唔單指唔讓座,重話d人衰到同大肚婆爭位座,日日如事
    20/04/2013
  • wtm246
    比第一胎辛苦....加油呀!!
    20/04/2013
  • Winnie
    暈都唔讓座真係太衰啦!
    22/04/2013
  • 小東
    好同意呀,我陀BB個陣,10個月得幾次有人讓座咋 而家抱住BB更加唔諗旨意人地讓座..都幾慘情
    23/04/2013
  • 烏G餅媽
    好o野呀.............你的妹妹夢成功了 我好感恩, 兩胎都冇嘔又冇改口味, 成日食唔飽貢, thanks God ~
    23/04/2013
  • Annie
    我陀一仔頭幾個月时去優之良品買了一包冬薑,回家剪到一粒粒入樽放手袋,胃一唔舒服就口含住一粒,胃会好d. 我要五、六個月見肚時,多數巴士乘客都肯讓座!
    24/04/2013
  • manchi
    原來係妹妹,成一個「好」字,恭喜哂
    24/04/2013
  • Emily
    開到口叫讓坐都唔肯~您話點會自動自覺讓吖! 我都試過遇到好多時,會讓坐嘅反而係公公婆婆, 點解依家香港人嘅公民意識咁差呢?~唉! 您成日見暈真係要小心d喇!唔好咁粗勞喇!得閒休息多d~ 叫DR比定d止暈藥您吖!
    24/04/2013
博客名稱 :
甜魔媽媽Yan
網誌名稱:
甜魔媽媽小天地
使用天數:2,328
性別:
按月份瀏覽
    2020
  • 一月
  • 二月
  • 三月
  • 四月
    2019
  • 一月
  • 二月
  • 三月
  • 四月
  • 五月
  • 六月
  • 七月
  • 八月
  • 九月
  • 十月
  • 十一月
  • 十二月
>> 更多
系統分類
  • 美容時尚
  • 飲食烹飪
  • 環球旅遊
  • 親子育兒
  • 數碼科技
  • 生活品味
  • 藝文創作
  • 電影戲劇
  • 寵物日誌
  • 戀愛心情
  • 文化政經
  • 其他
  • 財經生活
  • 台灣館
自行分類
最新留言