04
06.2017

孕~孕婦必須補品/食品!?(準備懷孕、懷孕期間)

親子育兒(健康)  
標籤: 孕婦  補品  準備懷孕 
由於之前都無預到會咁快有BB...所以所有食品、補品我都係懷孕1個多月後先食:p
 
「準備懷孕」
如果你係準備/想懷孕的話,聽說Materna、滴雞精、孕養孕補液都可以食/飲定~不過我就唔知有無用啦~
但係我有左之前,有幾樣野我有做到,我啲親友都話係增加懷孕機會,不過唔知真定假 :)
 
1. 中醫調理
我之所以睇中醫,係因為呢幾年我都生左好多瘡瘡...加上我有氣管敏感同經痛問題,所以我就睇左大概9個月~ (每次睇中醫只可以解決一個問題,唔好以為一次可以睇晒幾樣野!)
氣管敏感,我睇左2次就KO左,上一個冬季都無覆發!
經痛問題,係period前幾日就一定要去睇同戒凍野幾日~好似睇左4、5次我就唔再太痛,平時m到要食既止痛藥都唔再需要食~
瘡瘡問題,時好時壞...有乖乖飲藥嗰期真係好啲,因為醫師話係壓力同飲食習慣問題 T.T...
 
2. 響螺湯
我個人超級鐘意飲湯!響螺湯係我首選!
有BB前嗰3個月,媽媽個個星期都煲俾我同老公飲~點知我啲親友話響螺係壯陽...拿,我唔知嫁...
 
3. 唔用香水
唔知點解,以前我日日都用香水,有BB前2個幾月我用曬後一直無買過新就無再用~
助產待朋友話有好多報導都話香水會影響受孕成功率,不過就未正式有一份報告,所以睇你信唔信啦~
 
「懷孕期間」
1. 燕窩
由於媽媽唔太識燉野,所以我都係買即食既~
聽聞燕窩可以預防妊娠紋,而且多種礦物質和膠原蛋白~中醫角度佢性溫味甘,所以係一個好好養胎既選擇~
我試過白蘭氏、位元堂、華潤堂既即食燕窩,最好味既就係位元堂($218/6樽)!所以我應該回購左8次以上~由懷孕等4個月開始,我就隔日一樽~ 
 
2. Materna
我諗懷孕中既大家都一定有食,因為一粒就有齊孕婦每日所需既維他命、礦物質。(直頭多得濟,根本唔需要咁多,不過吸收唔到既養份會排返出黎~)
不過呢,我個人只係食左1/4樽都無...因為好難吞!救命,一吞就想嘔,就算到家下9個月我都係一吞就想嘔...加上個人覺得食嗰排無乜便便...所以我就無乜食過...
而且我都算係一個飲食均衡既孕婦~個人覺得除非你好偏食,否則都係可有可無~
 
3. 康鈣C
懷孕期間真係好怕自己會病!係大概4個幾月時我老公就病左...雖然佢已經第一時間去睇醫生,不過都係怕傳染我,所以我地都第一時間打算去買啲維他命C食,增強抵抗力!點知發現平時既維他命C保健食品得康鈣C寫到明孕婦可飲用 @0@
我見網上都有孕婦話日日飲,但我就揀食橙、奇異果,因為我係水果愛好者~有得揀我都係鐘意食野多過保健食品~
 
4. DHA保健品
um...第一次睇私家照BB時醫生問我有無食開DHA,我就因為怕蝕底,所以都話要食!
點知...買左返黎我包裝都未開過=.=...
廣告係sell DHA可以令BB醒目啲,不過我有自知自明~我同老公都唔係醒目,所以食幾多都補唔返,所以揀左唔食~ (要知道孕婦唔想既野,係會有一萬個不合邏輯既原因~~)
 
5. 滴雞精
頭先都有講過我係超級鐘意飲湯!不過媽媽都係一個星期煲2次~所以我一直都想試滴雞精!
滴雞精對我黎講最大既好處就係會令個人精神啲、胃口好啲~
滴雞精係台灣其實一早就已經有,香港反而無乜,我呢個傻人一開始仲擔心係雞精咁難飲...好彩唔係~
我飲過田原香、王朝同新出既鴻福堂~
個人覺得原味田原香($890/20包)最好飲~所以回購左3次~
王朝($420/10包)既原味我麻麻地,不過無記錯應該營養價值比田原香高少少~
而鴻福堂($225/5包)就個味好淡...但我又覺得比田原香同王朝飲落去油膩啲...不過就方便買,因為田原香、王朝既分店比較少,要網上訂送貨~
記得滴雞精要早上飲!因為飲完真係會精神啲~
所以我每日早上就係燕窩、滴雞精輪住飲~
 
6. 孕養液
佢既功用就同materna差不多,都係提供大量不同既維他命、礦物質。因為我就係吞唔到materna,所以我就打算試孕養液($460/枝)~台灣又係hit到爆,懷孕期間去左2次台北都見到好多廣告,所以又係怕蝕底既心態想買!發現香港都有就拿拿聲去買,點知...難飲到一個點...我個人本身就唔鐘意飲果醋,可能係因為咁,我真係覺得好難飲...T.T...(我飲左一啖就已經轉贈左俾人...)
 
7. 孕婦奶粉
孕婦奶粉都係有維他命、礦物質~只要你去做產檢時join啲媽媽會,就會有一大堆不同牌子既孕婦奶粉sample~
我個人,當然係揀邊款好味啦 :p
我飲過雪印、美素佳兒、美贊臣同明治~最後我揀左雪印($220/罐)~放係公司,平時下午4、5點餓既時候就飲一杯,因為飲完都幾飽,所以就下午茶時間KO佢~但係我都只係懷孕4-6個月有飲,因為飲完我覺得好飽,搞到晚餐又唔多想食...所以最後又係同自己講食好3餐,均衡飲食就好~
 
 
除左呢啲野,基本上除左雪糕、無寫明有殺菌既奶製品、魚生同蝶豆花外,我乜都食~
有左後,我特別鐘意食牛扒、提子、芥蘭~所以都自覺好健康~
 
由於我本身就偏瘦同輕,所以之前醫生話正常孕婦目標係成個孕期應該要重到8-12kg,而我既目標係10-15kg...一開頭因為一直都無乜重到所以都擔心阿b會係偏細,點知呢幾次check都話阿b都好叻追返係正常size~
所以宜家8個幾月雖然只係重左8kg,但應該全部去晒阿b到,所以媽媽就發達~阿b健康得黎我又唔洗減好多 :p
 
邀稿 : wingring417@gmail.com / wingring@ymail.com
發表於2017.6.04
留言(0)
博客名稱 :
Pig Wing
網誌名稱:
Pig Wing's blog
使用天數:2,100
性別:
按月份瀏覽
    2020
  • 一月
  • 二月
  • 三月
  • 四月
    2019
  • 一月
  • 二月
  • 三月
  • 四月
  • 五月
  • 六月
  • 七月
  • 八月
  • 九月
  • 十月
  • 十一月
  • 十二月
>> 更多
系統分類
  • 美容時尚
  • 飲食烹飪
  • 環球旅遊
  • 親子育兒
  • 數碼科技
  • 生活品味
  • 寵物日誌
  • 攝影寫真
  • 文化政經
  • 其他
  • 台灣館
自行分類